Kaanch ke gharonde, ye sheeshon ke mahal,
Chatak jate hain bas ek patthar se
Jagmagati hui ye deewali si sham,
Niras jo jati hai is akelepan se
Ye shorgul, ye chahalpahal,
Lupt ho jati hai raat ke sannatein mein…
Bade chamchamate, lubhavane shaher, inka ye badta khalipan,
Kahne ko paanv rakhne ki jagah nahi, per bheed mein abhi bhi akeli hi khadi hoon
Akash ko chooti ye imaratein, jinka nahi koi aadhar,
Stambhon per tiki hui, ektak dekhti rahti hai in gujre raaston ko…
Ek lambi sadak, jiska nahi koi oor chor,
Kahti hai chal de ab aar ya paar
Jahan raahein le jaye tujhe, manjilein pukare tujhe,
Per koi nahi hai in manjilon ka sani,aaj hai kal ho jayengi aani jani…
Wo bus ki dhakkamukki,Auto ki jhakjhak, bhagti train aur hawa se baat karte dupahiya vahan,, chan bhar ka rela hai, kuch palon ke baad fir wahi sab sunsaan…
Rojmarra ki khinchataan, subh ki daud office tak, sham ki daud ghar tak, is daud ki thakan bas raat ki kahani hai,
Kal ek fir nai subh, aur wohi roj ki ek kahani hai…
Main, mera ghar,mera pariwar,mera office, mera shaher…
Sab kuch mera bas mera hi to hai…
Jab tak na dhoondhoon koi paraya, lage sab apna hi hai…
Jo mere kadamon ke saath humkadam ho liya, bas wo apna hi hai…
Fir kya ye shaher aur kya wo shaher, sab mere apne bas apne hi hain.
Fir bhi iss shaher ke naam hai zindagi, meri saanson ki tarah ye bhi chalta ja raha hai, rat nirantar aviral…
Shaher ho bada ya chota, rahne walon ne ise banaya hai, har naye aanewale ne ise apnaya hai
Zindagi ki bhagdaud mein zindagi ke mayne badal gaye hain, per jeene ke nahi…
Isiliye chalta raha hai ye shaher, aur chalta rahega, hamari tumhari zindagi ke paydanon per………..
